我家呀ｍｉ

如果要問我屋企邊個大晒既話，呀ｍｉ認左第二就一定無人敢認第一。

佢唔想理你既話，話之你幾想同佢玩，佢都唔會騷你。之不過但係如果佢想搵人同佢玩或者幫佢掃毛，無論你幾唔得閒都好，最後都係要死死地氣抱住佢一邊掃一邊咩都唔做，因為咩都做唔到。貓就係咁架啦，高傲。

呀ｍｉ係唔會係你一返屋企就好興奮咁對住你既一隻貓，不過佢其實已經算好，至少會走去門口望下你，睇下係邊個返黎。不過你唔好諗住佢會纏住你，佢係唔會架。貓就係咁架啦，ｃｏｏｌ到死。

如果呀ｍｉ企係你ｄ　ｎｏｔｅｓ上面既話，無論你係咪讀緊書，你都係唔可以趕佢走既。所以你要由得佢，由得佢踐踏，由得佢咬，由得佢抓，重要由得佢訓係上面。佢訓係上面既時候，千企千企千企唔好托抱走佢，除非你想俾佢哀怨既目光電死你。貓就係咁架啦，咩都要就晒佢。

呀ｍｉ有時係夜晚絕對會煩到死架，因為佢會半夜三更不斷狂ｍｅｏｗ，真係狂ｍｅｏｗ，重要係奇高音個隻。重有呀，有時我會想幫佢影下相，不過佢就絕對唔係專業模特兒。因為佢唔想望鏡頭時，無論點佢都係唔會望既。而且影緊個陣，只要有少少風吹草動，佢就會即刻拍拍屁股走人，理得你部相機“卡”左未“嚓”完。貓就係咁架啦，睬你都晒氣。

呀ｍｉ就係咁架啦！性格高傲，大晒，唔睬人，但同時地擁有絕對的可愛。我地一齊生活，日對夜對，所以總係會發掘出佢好唔同既一面。呀ｍｉ好可愛，因為佢真係好千變萬化。佢可以好乖，可以好勇猛，亦可以好煩。其實諗深一層，呀ｍｉ既一切特權，都係寵返黎既。佢大晒，佢話事，因為唔捨得話佢，唔捨得打佢，唔捨得趕走佢。

有ｄ人會覺得貓太獨立太傲，其實都係架。就算你同佢一齊住都好，大家都總會大家既空間。佢唔係唔需要你，只係佢需要你既同時，亦好需要個人既空間。之不過，咁都唔係唔好姐，更何況佢有時都會好乖好舒服咁趴係你個身度陪你。或者對我黎講可能有ｄ野真係好似甜言蜜語咁，物以稀為貴，太多就會膩。有時我會係度諗，朋友間既相處都好似人同貓一樣，依賴而獨立。依賴同獨立都係缺一不可架，取得平衡先至係最重要既。只係我重未知道，究竟放幾多先可以達到平衡？