上個星期一連二晚看了梁祖祖有份演出的舞台劇(音樂劇)“你咪理，我愛你，死未！”和林一峰ｘｖｏｃａｌ ｓａｍｐｌｉｎｇ 的夏灣拿遊唱嘉年華，“唔駛問阿貴”我既心情梗係好到可以飛上天啦，哈哈！！！
5個月原來真的很快就會過去的了，票是五月的時候訂的，錢都一早就付好了（其實是我朋友一早付好，我昨天才把錢給她！！），我自己都差點忘記這次的舞台劇了，不要問我怎會忘記了，我自己都不知道，不過最後我當然是好好地坐在位子上看畢全場。這次的舞台劇未開始我已經很開心很興奮，真真是旅行那種未出發先興奮的心情，因為已經相隔很久沒有看過梁祖祖，楊詩敏他們的表演了！讓我想想，讓我想想，上一次看到他們的表現已經是ｗ創作社ｘ林一峰ｘ蘇玉華的＜你今日拯救左地球未呀？＞！！已經是半年前的事了！！
“你咪理，我愛你，死未！”當然係講愛情架啦，３個鐘既舞台劇，９成唱歌，講盡現代人荒謬的，兒嬉的，認真的，變了質的．．．．愛情！！其實個主題真係好簡單，二幕戲大約二十場，每一場都講出一種不同的愛，只談愛不悶嗎？真是不悶的，因為真是太好笑了，我們個個都笑聲連連呢！更何況變的不但是角色或者場景更重要的是演員在演繹不同角色時在心態上表達方式的改變。我想唯一不變的就是舞台裝潢和負責轉換場景的一對精子和卵子了！（他們很可愛的說！）我印象最深刻的一場是楊詩敏演的伴娘等嫁，其實同楊千嬅既歌“姊妹”有異曲同工之妙，都是說出好友一個個結婚去的感慨，不過這次的歌詞就更為到肉和抵死了，我自己就最愛當中的“好多婚禮吧 感到疲倦嗎 我最開心皆因 我都幾好掛 我一生足夠 哭泣歡笑全在手”．．．．邊個話女人一定要結婚架？對於這次的舞台劇，你問我好看嗎？我會說不過不失吧，比一般的好但又不及我所想像的好（可能是因為原裝英文版本的名聲太大了吧），不過說真的他們真的唱得很好呢，香港某些歌手要反省反省呢！！下年ｒｅ－ｒｕｎ的時候，我仍然推介大家有機會都去看一看吧，３個鐘裡看盡你一生中可能會遇到的愛情，值得的！
說到夏灣拿遊唱嘉年華，會有可能不好看嗎？有林一峰喎，見到一峰跳舞喎，講笑，真是很值得去看，不單是因為林生，好看是因為古巴的ｖｏｃａｌ ｓａｍｐｌｉｎｇ真的很出色，佢地六個人何至六把聲音呀，光是其中一個組員在台上ｓｏｌｏ已經可以扮晒所有電子樂器，由ｂａｓｓ到ｄｒｕｍ，好似去左睇ｂａｎｄ ｓｈｏｗ咁呀。一個已經咁正，六個一齊重得了，所以個晚真係覺得好正好神奇。佢地有既唔係技巧咁簡單，扮聲好多人都識，不過好似佢地咁可以唱得咁好聽又咁夾既就真係未聽過。不過都有一點我覺得唔夠好既，就係合作上既問題，咁呢次個ｓｈｏｗ既目的係希望將拉丁同廣東歌ｃｒｏｓｓｏｖｅｒ，睇下有咩化學作用架嘛，不過我係個ｓｈｏｗ度真係睇唔到咩化學作用，我覺得佢地似二個分開表演既單位多過合作囉！雖然佢地係有同台既機會，不過我覺得唔係咁樣就叫合作左囉，感覺上事先都無準備好咁既，而且，林一峰只係ｓｏｌｏ左３０分鐘，好唔夠呀！！不過講真，真係未試過睇ｓｈｏｗ睇到大家都起晒身跳晒舞拍晒手架，而且個個既面上都係掛住好大既笑容好開心好享受架！！好彩今次佢地係同林一峰合作，如果唔係我實會錯過呢個咁正既ｓｈｏｗ架。除左個ｓｈｏｗ正之外，更開心既係ｓｈｏｗ後見到林一峰呀，當然簽左名啦，不過我當錦上添花架咋！哈哈～
No comments:
Post a Comment